တရားကို သိမြင်လျှင် ပဋိစ္စသမုပ္ပါဒ်ကို သိမြင်၏ ...
ပဋိစ္စသမုပ္ပါဒ်နားမလည်ရင် ဒိဋ္ဌိမပြုတ် -
ဒိဋ္ဌိမပြုတ်ရင် တရားအားထုတ်လည်း တရားမရနိုင် ....
ဒါကြောင့် တရားအားထုတ်သူ ယောဂီအနေနဲ့
ပဋိစ္စသမုပ္ပါဒ်ကို သိမြင်နားလည်အောင်အရင်လုပ်ရမယ်။
မြတ်စွာဘုရားရှင်လက်ထက်တော်အခါက
အရှင်ဆန္ဒမထေရ် (ဆန္ဒအမတ်) ဟာ
၀ိပဿနာအလုပ်ကို နှစ်ရှည်လများကြိုးပမ်းအားထုတ်ပါသော်လည်း
ပထမ (သောတာပတ္တိ) မဂ်ဉာဏ်၊ ဖိုလ်ဉာဏ်ကိုပင် ရနိုင်ခြင်းမရှိခဲ့ဘူးဆိုတာ
မှတ်သားစရာတစ်ခုပဲဖြစ်တယ်။
သူက အခြားတပါးသော ရဟန်းတော်များထံသို့
လှည့်လည်သွားလာပြီး သူသည် ၀ိပဿနာရှု့တဲ့အခါ အနိစ္စကိုလည်း
မြင်ပါတယ်၊ ဒုက္ခကိုလည်းမြင်ပါတယ် သို့ပါလျက်ကယ်နှင့် မဂ်ဉာဏ်၊
ဖိုလ်ဉာဏ်မရကြောင်း ထုတ်ဖော်ပြောဆိုတယ်။
တကယ်လည်းသူ့မှာ နှစ်ပေါင်းလေးဆယ်ကျော်ကြာအောင်
ကြိုးပမ်းအားထုတ်လာခဲ့တာပါ။
သူ့အနေနဲ့ ရုပ်သည် အမြဲမရှိ ဖောက်ပြန်တတ်ကြောင်းကိုလည်းသိပါရဲ့ ....
ထို့အတူ ဝေဒနာ၊ သညာ၊ သင်္ခါရ၊ ၀ိဉာဏ်တို့သည်လည်း
မြဲမြံ့ခြင်းမရှိကြောင်းသိပါရဲ့ ... အနိစ္စကို သိသော်လည်း
အနတ္တကို စဉ်းစားမိသောအခါ သူ့စိတ်ထဲမှာ
ချောက်ကမ်းပါး စောက်ကြီးထဲ လိမ့်ကျသွားရတော့မတတ်
ခံစားရကြောင်းပြောဆိုပါတယ် .....
သူကဆက်ပြောသေးတယ်။
တကယ်လို့များတဲ့...
ခန္ဓာငါးပါးစလုံးသာ အနတ္တဖြစ်နေရင်
သူဘာကို အားကိုးရတော့မလဲတဲ့ ....
ဒီလိုနဲ့ အချိန်ကာလတို့ကြာမြင့်ခဲ့လို့ အနှစ် (၄၀) ကျော်လာခဲ့ပြီး
မြတ်စွာဘုရားသာ ပရိနိဗ္ဗာန်ပြုသွားတယ်၊
သူ့မှာ တရားထူးမရပါပဲ ကျန်ရစ်ခဲ့ရရှာတယ်။
ဘုရားပရိနိဗ္ဗာန်ပြုပြီးနောက်မှာတော့ သူ့ကို ရဟန်းသံဃာတို့က
ဗြဟ္မဒဏ်ခတ်ထားကြလိုက်တယ်။
ဒါနဲ့အရှင်ဆန္ဒလည်း ဘုန်းကြီးကျောင်းတစ်ကျောင်းဝင်၊
တစ်ကျောင်းထွက်လှည့်လည်သွားလာပြီး သူ့ကို ပြောဆိုဆုံးမကြပါလို့ တောင်းပန်တိုက်တွန်းနေခဲ့ရရှာတယ်၊ ဒါလည်းဘာမှ အကျိုးထူးတယ်မရှိခဲ့ဘူး။
နောက်ဆုံးတော့ သူ့စိတ်ထဲမှာ အရှင်အာနန္ဒာကိုသာ အားထားချဉ်းကပ်လို့အသင့်တော်ဆုံးလို့ သတ်မှတ်ပြီး အရှင်အာနန္ဒာနဲ့တွေ့လို့ သူတွေ့ကြုံနေရတဲ့အဖြစ်ပျက်အလုံးစုံရှင်းလင်း
ပြောပြရပါတော့တယ်။ ဒါနဲ့ အရှင်အာနန္ဒာက သူတရားမရတာ ပဋိစ္စသမုပ္ပါဒ်တရားတော်ကို ကောင်းကောင်းနားမလည်လို့ဆိုတာသိပြီး သူ့မှာ ဒိဋ္ဌိမပြုတ်သေးတော့ မဂ်တား၊ ဖိုလ်တား ဖြစ်နေရတာကို
နားလည်သွားတယ်။ ဒါကြောင့် အရှင်အာနန္ဒာက သူ့ကို စိတ်သက်သာစေတဲ့အားပေးစကားပြောဆိုပြီး ပဋိစ္စသမုပ္ပါဒ်ဒေသနာတော်ကို မြတ်စွာဘုရားလက်ထက်က ကစ္စာယနအနွယ်ရဟန်းတစ်ပါး ကို သင်ကြားပြသည့်အတိုင်း
သင်ကြားပြသပေးခဲ့ပါတယ်။
ဒီလိုနဲ့အရှင်ဆန္ဒဟာ ပဋိစ္စသမုပ္ပါဒ်ဒေသနာကို ကောင်းစွာနားလည်သဘောပေါက်ပြီး တရားအားထုတ်လိုက်တဲ့အခါမှာ သက္ကာယ၊ သဿတ၊ ဥစ္ဆေဒဒိဋ္ဌိတို့ကို ရှင်းလင်းသုတ်သင်နိုင်တော့တယ်၊ ဒိဋ္ဌိပြုတ်ပြီးမကြာမီမှာ
သောတာပတ္တိမဂ်ဉာဏ်၊ ဖိုလ်ဉာဏ် ရရှိပါတော့တယ်။
ဒါကိုကြည့်ရင် အရှင်ဆန္ဒတရားမရဘဲ အနှစ်လေးဆယ်ကျော်ကြန့်ကြာနေခဲ့တာ ပဋိစ္စသမုပ္ပါဒ်ဒေသနာတော်ကို ကောင်းကောင်းနားမလည်ခဲ့လို့ဆိုတာ မှတ်သားကြရမယ်။
ဒါကြောင့် တရားအားထုတ်တဲ့ယောဂီတွေအနေနဲ့ ပဋိစ္စသမုပ္ပါဒ်ကို အရင်သိမြင်နားလည်အောင်လုပ်ပြီးနောက် ဒိဋ္ဌိဖြုတ်နိုင်ကြပါစေလို့ ဆန္ဒပြုရင်း ....
- စာဖတ်သူအားလုံး တရားနဲ့မွေ့လျော်၊ တရားနဲ့ပျော်နိုင်ကြပါစေ -
{{ စာကိုး - ၀ိပဿနာရှု့နည်းလက်စွဲကျမ်း }}
No comments:
Post a Comment